11.06.2024

У Беларусі ўстаноўлены юбілейны медаль да 30-годдзя КДК

 

Кіраўнік дзяржавы Аляксандр Лукашэнка 10 чэрвеня падпісаў указ нумар 220 аб устанаўленні юбілейнага медаля "30 год Камітэту дзяржаўнага кантролю Рэспублікі Беларусь", паведамілі БЕЛТА ў прэс-службе Прэзідэнта.

Дакументам таксама зацверджана палажэнне аб медалі, яго апісанне і ўзор пасведчання да яго.

На правым баку ў цэнтры медаля размешчаны геральдычны знак - эмблема КДК, па акружнасці - стужка з арнаментам, а ўнізе - рэльефны надпіс "30 год". На адваротным баку - надпіс "Камітэт дзяржаўнага кантролю Рэспублікі Беларусь", стылізаваная лаўровая галіна і даты "1994 - 2024".

Узнагароджваць медалём будуць работнікаў і ветэранаў КДК за ўзорнае выкананне службовых абавязкаў, дасягненне высокіх вынікаў работы, а таксама іншых асоб - за значны ўклад у развіццё і ўдасканаленне дзейнасці па абароне інтарэсаў дзяржавы ад проціпраўных дзеянняў у эканамічнай сферы, забеспячэнне эканамічнай бяспекі краіны.

Юбілейная дата будзе адзначацца 2 жніўня 2024 года, у дзень стварэння Службы кантролю Адміністрацыі Прэзідэнта Рэспублікі Беларусь, правапераемнікам якой з'яўляецца Камітэт дзяржаўнага кантролю.