10.08.2026

"Жаночы хіт" і вогнішчы адзінства. Чым здзівіць гасцей свята "Талака Фэст" у Дубровенскім раёне

У аграгарадку Сватошыцы Дубровенскага раёна 14-15 жніўня ў трэці раз адбудзецца свята "Талака Фэст", яно пройдзе пад слоганам "У адзінстве сіла, у жанчыне — душа!". Пра гэта карэспандэнту БЕЛТА паведаміў дэпутат Палаты прадстаўнікоў Нацыянальнага сходу Рэспублікі Беларусь Уладзімір Бабічаў.

Як адзначыў Уладзімір Бабічаў, гісторыя свята пачалася ў 2024 годзе - у год 30-годдзя прэзідэнцтва Аляксандра Лукашэнкі. У аснову яго канцэпцыі ляглі словы Прэзідэнта "Страцім вёску — страцім дзяржаву", якія сталі для многіх кіраўніцтвам да дзеяння. Менавіта таму арганізатары выбралі дату правядзення свята - роўна за месяц да Дня народнага адзінства. І такая назва свята была абрана невыпадкова. Здаўна на беларускай зямлі "талакой" называлі сумесную працу - калі ўсёй вёскай выходзілі на сенакос, будавалі дом або дапамагалі сям'і, якая патрапіла ў бяду. Гэты прынцып узаемадапамогі - галоўная ідэя свята. Сама яго гаспадыня Талака стала жывым сімвалам адзінства.

Арганізатары падрыхтавалі насычаную двухдзённую праграму, дзе кожны знойдзе мерапрыемства па душы. Паколькі 2026 год аб'яўлены Годам беларускай жанчыны, музычная частка свята атрымала адпаведнае гучанне. Яго адкрые "чыста мужчынскі канцэрт", на якім моцная палова чалавецтва выканае песні для жанчын.

У другі дзень для гасцей будуць працаваць інтэрактыўныя пляцоўкі ў фармаце "Мікс-талака", дзе можна будзе наведаць фуд-корты з духмянымі стравамі народнай кухні і ўтульныя зоны кейтэрынгу на свежым паветры, пазнаёміцца з народнымі рамёствамі і прыняць удзел у майстар-класах, пакатацца на атракцыёнах. Таксама тут адбудзецца выступленне выканаўцаў, вакальных груп, кавер-калектываў, тэатра песні з Дубровенскага, Талачынскага і Аршанскага раёнаў.

Цэнтральнай падзеяй стане ўрачыстае адкрыццё свята, узняцце яго сцяга, прэзентацыя афіцыйнай песні. Таксама тут прагучыць "Жаночы хіт" - пранікнёныя песні пра жаночую долю, лёс і каханне. Важнай часткай праграмы стане абрад "Свечка адзінства" і ўрачыстая цырымонія запальвання вогнішчаў адзінства. Завершыць вечар "Талакова ноч", дзе запальныя рытмы і любімыя мелодыі захопяць усіх у танцы, і святочны феерверк.

"Сёлета праект "Талака Фэст" стаў пераможцам конкурсу грамадзянскіх ініцыятыў — сур'ёзнае пацвярджэнне таго, што свята важнае для кожнага. Гэта месца, дзе традыцыі зліваюцца з сучаснасцю, а кожны госць адчувае сябе часткай вялікай і дружнай сям'і", — падкрэсліў Уладзімір Бабічаў.

dubrovno.by