15.04.2025

У будынку АПС №1 г. Дуброўна адкрыўся гандлёвы аб'ект

Новая крама так і называецца — "ПоштаМаркет".

Для зручнасці кліентаў тут арганізаваны продаж тавараў шырокага асартыменту па сістэме самаабслугоўвання: стэлажы і вітрыны з таварам вынесены ў залу.

- Цяпер гандаль не адцягвае работнікаў пошты ад асноўнай дзейнасці: афармлення падпісак на перыёдыку, прыёму і дастаўкі паштовых адпраўленняў, пісьмовай карэспандэнцыі і друкаваных сродкаў масавай інфармацыі, дастаўкі пенсій, ажыццяўлення грашовых пераводаў і гэтак далей, - адзначыла намеснік старшыні райвыканкама Святлана Рыжанская. - Але галоўнае, цяпер пошта працуе больш рацыянальна. Раней тавары знаходзіліся за спіной работнікаў, і адказы на пытанні кліента, прапанова тавару займала пэўны час, які яны маглі патраціць на абслугоўванне іншых наведвальнікаў. Цяпер чалавек узяў кошык і ходзіць, выбірае.

У "ПоштаМаркеце" наведвальнікі без спешкі могуць выбраць неабходныя харчовыя і прамысловыя тавары. На паліцах - мясная і рыбная, малочная і хлебабулачная прадукцыя, кандытарскія вырабы, сокі і напоі. Асобнае месца займаюць прамысловыя тавары, якія карыстаюцца попытам у паўсядзённым жыцці. Ды і кошты лаяльныя, што завецца, для народа.

- "ПоштаМаркет" - новы праект, які рэалізуецца на тэрыторыі Віцебскай вобласці. І крама ў Дуброўне - шосты па ліку ў яго рамках. Спадзяюся, мы прыемна здзівім наведвальнікаў сваімі коштамі і асартыментам, які ўжо ў бліжэйшы час будзе пашыраны, - распавяла начальнік Аршанскага РВПС Ірына Жыркевіч.

Большасць дубровенцаў бывае на пошце рэгулярна. Многія прыходзяць сюды не толькі атрымаць пенсію або аплаціць камунальныя паслугі, а таксама здзейсніць пакупкі:

- Пошта для людзей ва ўзросце - гэта цэнтр жыцця. Таму абноўленае памяшканне мне вельмі спадабалася. Зручна: не трэба марнаваць час і ісці ў краму, каб купіць насенне для агарода або цукеркі да гарбаты, `- падзялілася адна з пакупніц.

Адкрыццё "ПоштаМаркета" ў Дуброўне - адзін з прыкладаў паляпшэння ўмоў жыцця насельніцтва, лічыць намеснік старшыні райвыканкама па эканоміцы Сяргей Палуйчык:

- У нашым горадзе размешчана шмат гандлёвых аб'ектаў, і канкурэнцыя дастаткова высокая. Але, вывучыўшы пералік прапанаваных тут тавараў, асобныя з якіх у іншых прадаўцоў сустракаюцца рэдка, упэўнены, што новая крама знойдзе сваіх пакупнікоў.

dubrovno.by