17.04.2025

У Дуброўне прайшоў прафсаюзны прававы прыём

Прафсаюзныя прававыя інспектары працы працягваюць кансультаваць грамадзян па пытаннях працоўнага заканадаўства.

Чарговая магчымасць атрымаць кваліфікаваную бясплатную юрыдычную дапамогу ў галіне працоўнага права ў дубровенцаў, як і ва ўсіх жыхароў Віцебшчыны, была  27 сакавіка.

У кансультаванні грамадзян у рамках прафсаюзных прававых прыёмаў, як правіла, таксама бяруць удзел пракурорскія работнікі. Узаемадзеянне спецыялістаў дапамагае аператыўна вырашыць складанасці ва ўзаемаадносінах паміж наймальнікам і работнікам. Такім чынам, звяртаючыся па дапамогу ў прафсаюз, чалавек часта атрымлівае не проста граматнае тлумачэнне сваіх правоў работніка, але і фактычнае вырашэнне свайго пытання.

Таццяна Яшчанка, галоўны прававы інспектар працы Віцебскай вобласці арганізацыі Беларускага прафсаюза работнікаў адукацыі і навукі, праводзіла прыём на базе сярэдняй школы №2 г. Дуброўна імя Ю. Смірнова.

Яна дапамагла тым, хто звярнуўся па юрыдычную дапамогу, разабрацца ў пытаннях дзеяння норм калектыўнага дагавора, скасавання кантракта па пагадненні бакоў, прадастаўлення водпуску без захавання зарплаты, правілаў выдачы сродкаў індывідуальнай абароны, а таксама па пытаннях размеркавання выпускнікоў ВНУ і працаўладкавання непаўналетніх. Акрамя таго, яна правяла кансультацыі са спецыялістамі ўстановы адукацыі па пытаннях вядзення асабістых спраў, прыёму, захоўвання і вядзення працоўных кніжак, а таксама па складанні правіл працоўнага распарадку ўстановы адукацыі і накладання дысцыплінарнага спагнання на работніка.

У рамках прававога прыёму адбылася гутарка з працоўным калектывам у рамках дня прававой асветы і прававой культуры на тэму "Парадак прадастаўлення працоўных і сацыяльных водпускаў".

Варта адзначыць, што тлумачальная і кансультатыўная работа па пытаннях, якія найбольш цікавяць грамадзян, праводзіцца прафсаюзамі на пастаяннай аснове. Так, у рамках правядзення прафсаюзных прыёмаў, прававой асветай у 2024 годзе ахоплена каля 9 тысяч чалавек. За 2024 год галоўным прававым інспектарам прававой інспекцыі працы абласнога аб'яднання Святланай Супрунчук накіраваны пісьмовыя адказы на 43 пытанні, якія паступілі праз форму заяўкі на бясплатную юрыдычную кансультацыю на партале 1prof.by.

dubrovno.by