17.04.2025

У Дубровенскім раёне адбыўся конкурс прафесійнага майстэрства прыёмных бацькоў

У Дубровенскім раёне адбыўся конкурс прафесійнага майстэрства прыёмных бацькоў "Мая сям'я - мой цёплы дом".

Ён праводзіцца з мэтай развіцця сямейных форм уладкавання дзяцей-сірот, распаўсюджвання станоўчага вопыту выхавання дзяцей і грамадскага прызнання работы прыёмных бацькоў.

Ва ўтульнай зале Цэнтра дзяцей і моладзі сабраліся практычна ўсе прыёмныя сем'і раёна: хтосьці павінен быў удзельнічаць у конкурсе, хтосьці падрыхтаваў нумары мастацкай самадзейнасці, а хтосьці прыйшоў набрацца вопыту і натхнення для работы.

— У Дубровенскім раёне сёння ў 17 прыёмных сем'ях выхоўваецца 32 дзіцяці і ў чатырох апякунскіх — чатыры. Мы імкнемся не толькі аказваць метадычную дапамогу тым, хто вырашыў прысвяціць сябе гэтай высакароднай справе, але і стараемся далучаць прыёмных бацькоў, бацькоў-выхавальнікаў у актыўную творчую дзейнасць, каб дапамагчы ім паўней раскрыць фізічныя, інтэлектуальныя, творчыя здольнасці дзяцей, якія выхоўваюцца ў іх сем'ях, — распавяла галоўны спецыяліст аддзела па адукацыі Ірына Арцем'ева, якая ў гэты раз узначаліла журы, або сямейны савет конкурсу.

Паказаць паразуменне, уменне ўзаемадзейнічаць, добразычлівае стаўленне адзін да аднаго трэба было пяцёра камандам-сям'ям, якім было дадзена вялікае хатняе заданне: трэба было падрыхтаваць відэаролік аб сваёй сям'і, фотаальбом, напісаць сачыненне і прыгатаваць любімую страву. Журы гэтыя конкурсы ацэньвала асобна. А яшчэ канкурсантам неабходна было вырашыць творчыя задачы прама ў зале седзячы пад пільным поглядам сямейнага савета і пры эмацыйнай падтрымцы гледачоў. Самым цікавым, на наш погляд, быў конкурс "Зразумей мяне". Мамы -і  ў прынцыпе, шмат хто ў зале - не кожнаму маладзёжнаму слоўку змаглі даць выразнае тлумачэнне, а вось дзеці з задавальненнем змаглі працягнуць прыказкі і прымаўкі, якія ім прапанавалі вядучыя.

У час перапынку мы пацікавіліся ва ўдзельніц аб тым, ці трэба праводзіць такія конкурсы.

- Так, яны неабходныя, - упэўнена адказала Вольга Махначова, якая выхоўвае трох прыёмных сыноў. - Гэта дапамагае пасябраваць, паглядзець на іншыя сем'і, павучыцца ў іх чаму-небудзь.

Дарэчы, сям'я Вольгі Сяргееўны прызнана самай музычнай, таму што ўсе яе дзеці займаюцца ў ДШМ. Адна з дзяўчынак нават паступіла ў музычнае вучылiшча.

Вельмі грунтоўна падрыхтавалася да конкурсу Ала Іванова са сваімі дзецьмі: яны аформілі ўнікальны фотаальбом і макет сваёй сядзібы: дом з поўнай абстаноўкай і дзіцячую пляцоўку ў двары яны склеілі з кардона і размалявалі ў яркія колеры. Завошта атрымалі перамогу ў намінацыі самая творчая сям'я. Самай артыстычнай прызнана сям'я Святланы Безнасенкі, самай актыўнай - Валянціны Зімы, а самай гаспадарчай - Таццяны Шлупаковай.

Усе сем'і атрымалі сувеніры ад аддзела па адукацыі, РА ГА БРСМ і дырэктара прыватнага будаўніча-гандлёвага прадпрыемства Таццяны Аляксейчык.

- Сёння мы ўбачылі, колькі сіл аддаюць гэтыя жанчыны, каб дзеці раслі ў каханні і клопаце. Мы бачылі ў роліках і фотаальбомах, што яны жывуць жыццём і клопатамі звычайных сем'яў: разам робяць працу па хаце, дапамагаюць адзін аднаму з урокамі. Мамы імкнуцца развіваць кругагляд дзяцей: выязджаюць на экскурсіі, удзельнічаюць у акцыях і святах, забяспечваюць наведванне дзецьмі гурткоў і секцый. Вялікі дзякуй мамам за гэта, няхай у іх будзе яшчэ шмат сіл для дапамогі гэтым дзеткам, - сказала Таццяна Аляксейчык.

- Прыёмныя бацькі - гэта няпростая, але вельмі важная прафесія. Тут усё роўна ваша адукацыя, важна жаданне стаць камусьці проста мамай: вучыць, клапаціцца, дапамагаць расці чалавекам. Аддзелу па адукацыі патрэбны такія людзі. Прыходзьце, а мы дапаможам вам стаць самым галоўным у жыцці чалавекам - мамай, - сказала пасля конкурсу Ірына Арцем'ева.

ДАРЭЧЫ

Браты і сёстры - як праменьчыкі аднаго сонейка, як лісце аднаго дрэўца, як звёны аднаго ланцужка. Родныя з нараджэння, крэўныя сёстры і браты павінны заставацца роднымі назаўжды. Яны адзін для аднаго - гарант абароны і дапамогі ў бядзе або ў адзіноце. Але часта жыццёвая бязладзіца, крыўды, розныя шляхі і адлегласці аддаляюць іх. Дзень братоў і сясцёр - свята, якое адзначаецца 10 красавіка, заклікана прадоўжыць слаўную традыцыю ўшаноўвання сямейных і роднасных сувязей, умацоўваючы адносіны паміж блізкімі людзьмі. У гэты дзень не забудзьцеся павіншаваць сваіх братоў і сясцёр, абняць іх і расказаць пра тое, як яны вам патрэбны.

dubrovno.by