02.05.2025

Рэспубліканскі маладзёжны кірмаш вакансій прайшоў у Дуброўне

Пытанням часовай працоўнай занятасці навучэнскай моладзі надаецца вялікая ўвага.

Хутка летнія канікулы - доўгачаканая пара для школьнікаў і студэнтаў. Хопіць часу і на тое, каб адпачыць, і на тое, каб зарабіць грошы, палепшыць навыкі камунікацыі, праявіць сябе ў камандзе, атрымаць першы досвед і падрыхтавацца да самастойнага выхаду на рынак працы.

Даведацца аб парадку прыёму і варыянтах працаўладкавання, а таксама аб умовах і працягласці працоўнага дня, юнакі і дзяўчаты змаглі падчас маладзёжнага кірмашу вакансій, арганізаванага ўпраўленнем па працы, занятасці і сацыяльнай абароне Дубровенскага райвыканкама на базах гарадскіх школ.

— З 21 па 25 красавіка 2025 года ў Рэспубліцы Беларусь прайшоў трэці Рэспубліканскі маладзёжны кірмаш вакансій. Мерапрыемства было накіравана на садзейнічанне ў працаўладкаванні навучэнскай моладзі і выпускнікоў навучальных устаноў. У Дубровенскім раёне з 22 па 23 красавіка прадпрыемствамі і арганізацыямі раёна прапанаваліся маладым людзям 75 вакансій у розных сферах дзейнасці. Гэта цудоўная магчымасць для працаўладкавання моладзі ў вольны ад вучобы час і перыяд летніх канікул, — адзначыла галоўны спецыяліст упраўлення па працы, занятасці і сацыяльнай абароне райвыканкама Наталля Палуйчык.

На мерапрыемстве прысутнічалі прадстаўнікі арганізацый і прадпрыемстваў, якія маюць магчымасць прыняць на працу ў перыяд летніх канікул моладзь ва ўзросце ад 14 гадоў.

Арганізатары падрыхтавалі насычаную праграму, каб дапамагчы кожнаму знайсці прыдатную працу, атрымаць каштоўныя кансультацыі і нават, магчыма, вызначыцца з будучай кар'ерай.

Працадаўцы расказвалі аб спецыфіцы той ці іншай вытворчасці, адказвалі на пытанні аб працоўным заканадаўстве. Спецыялісты ўпраўлення па працы, занятасці і сацыяльнай абароне пракансультавалі па відах работ на рынку працы, а таксама па сацыяльных гарантыях для непаўналетніх ад 14 да 17 гадоў. Расказалі пра магчымасць азнаямлення з вакансіямі на партале дзяржаўнай службы занятасці і лічбавым сэрвісе "Крок у прафесію".

Многія хлопцы, вывучыўшы ўсе прапановы на кірмашы вакансій, бралі кантакты працадаўцаў, а затым ішлі дадому, каб параіцца з бацькамі і вырашыць, што ім падыходзіць. Некаторыя суіскальнікі адразу знаходзілі, дзе будуць спрабаваць свае сілы. Навучэнец 9 класа сярэдняй школы №1 г. Дуброўна імя А.А. Нікандравай Ягор Кубрачкоў упершыню будзе працаваць на летніх канікулах. Юнак прызнаўся, што хацеў працаўладкавацца яшчэ мінулым летам. Аднак па пэўных абставінах гэта не атрымалася. Але на пачатку навучальнага года аднакласнікі падзяліліся эмоцыямі і ўражаннямі ад працы на Дубровенскім ільнозаводзе. Тады Ягор сапраўды вырашыў, што трэба паспрабаваць. Так ён аказаўся адным з першых, хто пакінуў свае кантакты гэтаму працадаўцу. "Мне хацелася знайсці занятак на лета, каб не толькі правесці час з карысцю, але і крыху зарабіць. Да таго ж планую працаваць са сваімі аднакласнікі, а значыць, час за працай пройдзе вельмі хутка", - падзяліўся навучэнец.

Кірмаш вакансій для моладзі аказаўся паспяховым мерапрыемствам, якое дапамагло многім знайсці працу на лета. Дзякуючы такім ініцыятывам маладыя людзі маюць магчымасць атрымаць каштоўны досвед працы і развіцця сваіх навыкаў, што, безумоўна, будзе карысна для вызначэння іх прафесійнага шляху.

dubrovno.by