27.03.2025

Раённы штаб па навядзенні парадку на зямлі і добраўпарадкаванні населеных пунктаў прайшоў у Дуброўне

Пад кіраўніцтвам старшыні Дубровенскага раённага выканаўчага камітэта Анатоля Лукашова прайшло чарговае пасяджэнне раённага штаба па навядзенні парадку на зямлі і добраўпарадкаванні населеных пунктаў.

У мерапрыемстве прынялі ўдзел старшыня раённага Савета дэпутатаў Алена Ціханава, намеснікі старшыні райвыканкама, а таксама прадстаўнікі розных аддзелаў і службаў, кіраўнікі мясцовых арганізацый, прадпрыемстваў і ўстаноў.

Кіраўнік раёна, выступаючы на пасяджэнні, нагадаў, што 2025 год аб'яўлены Прэзідэнтам Рэспублікі Беларусь Аляксандрам Лукашэнка Годам добраўпарадкавання. Ён таксама паведаміў, што ў лютым зацверджаны рэспубліканскі і абласны планы, цяпер трэба будзе абмеркаваць і зацвердзіць, якія змяненні і дапаўненні неабходна ўнесці ў аналагічны план на ўзроўні раёна.

На пасяджэнні было адзначана, што на кожным прадпрыемстве Дубровенскага раёна распрацаваны індывідуальны план па добраўпарадкаванні. Акрамя таго, створана агульная карта замацавання прадпрыемстваў, арганізацый і індывідуальных прадпрымальнікаў за рознымі аб'ектамі, вуліцамі, тэрыторыямі ў горадзе і іншых населеных пунктах раёна. Усю гэтую работу курыруе аддзел архітэктуры і будаўніцтва, жыллёва-камунальнай гаспадаркі райвыканкама пад кіраўніцтвам намесніка старшыні Аляксандра Шатраўкі.

Важная роля адводзіцца рэгулярнаму маніторынгу выканання планаў. Вынікі работы будуць штомесяц разглядацца на пасяджэннях райвыканкама і сесіях раённага Савета дэпутатаў. Справаздачы аб выкананай рабоце будзе прадстаўляць і раённая інспекцыя прыродных рэсурсаў і аховы навакольнага асяроддзя, а таксама аддзел землеўпарадкавання і санітарная служба.

Некаторыя работы па добраўпарадкаванні ўжо стартавалі: ідзе раскарчоўка непрадуктыўных садоў, культуртэхнічныя работы, знос пустуючых і старых дамоў, прайшоў першы раённы суботнік. Штотыдзень практычна ўсе арганізацыі ўдзельнічаюць ва ўборцы і добраўпарадкаванні падведамных тэрыторый.

На думку старшыні райвыканкама, немалаважны момант ва ўказе - акцэнт на тандэм дзяржавы і грамадства.

- Важна, каб чалавек не проста сядзеў склаўшы рукі і чакаў ад дзяржавы, калі яму створаць адпаведныя ўмовы, але і імкнуўся ўнесці сваю лепту, каб вакол яго дома, пад'езда станавілася лепш, прыгажэй і камфортней, — падкрэсліў ён. - Тое, што робіш сам, шануеш і беражэш значна больш. Пасадзіў дрэва або ўладкаваў клумбу, усталяваў лаўку ў двары дома, навёў парадак у парку, выйшаў на суботнік — усё гэта ўклад у якасць нашага жыцця: для сябе, сваіх дзяцей і ўнукаў.

Алена Ціханава адзначыла, што з кожным годам усё больш людзей праяўляюць ініцыятыву і добраахвотна выходзяць на суботнікі, каб прывесці ў парадак свой населены пункт. Удвая гэта важна для маладога пакалення, якое таксама будзе пераймаць гэты прыклад, бо дапамагаць сваёй краіне станавіцца лепш і камфортней — лепшая праява патрыятызму.

- Наша задача - прыцягнуць да гэтай вялікай работы кожнага, зацікавіць і падштурхнуць. І ў гэтым пытанні размова не толькі пра камфорт для жыцця людзей, але і пра іх згуртаванне і аб'яднанне адной справай, — заключыла кіраўнік дэпутацкага корпуса раёна.

Акрамя таго, на Дубровеншчыне працягнуцца конкурсы на лепшы сельсавет і лепшае домаўладанне, якія закліканы стымуляваць актыўную пазіцыю грамадзян у пытаннях добраўпарадкавання.

dubrovno.by