03.06.2025

Раённае свята "Наш час" прайшло ў Дуброўне

Традыцыйна на Дубровеншчыне ў Дзень абароны дзяцей у гарадскім парку "Ліпкі" арганізуецца насычаная праграма.

Шэсце калектываў дзіцячай творчасці раёна, агляд-конкурс канцэртных нумароў, забаўляльныя і тэматычныя пляцоўкі, фестываль фарбаў. На свята прыйшлі цэлымі сем'ямі. Гукі музыкі, звонкія дзіцячыя галасы, танцы, гульні і розныя тэматычныя лакацыі, фотазоны — так пачаўся першы дзень лета ў маленькіх дубровенцаў.

Раённае свята "Наш час", арганізаванае РДК, — гэта не толькі песні, танцы і конкурсы. Насычаная забаўляльная і пазнавальная праграма чакала дзяцей і іх бацькоў. Кожны мог знайсці нешта па душы.

На свяце быў дадзены старт інфармацыйна-прапагандысцкай акцыі "Бяспечныя канікулы". Ратавальнікі падрыхтавалі для дзяцей і дарослых цікавыя інтэрактыўныя навучальныя пляцоўкі, паўдзельнічаўшы ў якіх кожны атрымліваў памятныя прызы і падарункі ад МНС. Супрацоўнікі ТРВОДа вучылі, як правільна паводзіць сябе паблізу вадаёмаў, а міліцыянеры — на дарозе, уручаючы ўсім памяткі і флікеры.

— Вельмі крута, класна, весела. Я паспеў і ў міліцэйскай машыне пасядзець, і ў пажарнай, прымерыць выратавальную камізэльку і нават ласты, а за правільныя адказы яшчэ і падарункі атрымаў. Мне ўсё вельмі спадабалася, — распавёў Ілля Лабейка.

Вялікай папулярнасцю карысталася пляцоўка, арганізаваная раённым аддзяленнем Беларускай партыі "Белая Русь".

— Дзеці, як ніхто іншы, безабаронныя перад рэаліямі сучаснага свету. Менавіта таму яны маюць патрэбу ў асаблівай падтрымцы з боку дарослых. Мы традыцыйна праводзім розныя мерапрыемствы ў рамках праекта "Партыя — дзецям". Ініцыятыва заклікана дапамагчы юным грамадзянам нашай краіны раскрыць таленты, стварыць святочны настрой напярэдадні доўгачаканага лета, — адзначыла старшыня раённага аддзялення Ларыса Крыштопава.

Усе ўдзельнікі і госці свята атрымалі мора пазітыву, яркіх і незабыўных эмоцый.

— Дзеці вельмі рады — мора ўражанняў, мы зарадзіліся добрым настроем на ўвесь дзень, — падзялілася мама дваіх сыноў Аляксандра Цітова.

dubrovno.by