22.07.2025

На Дубровеншчыне прыступілі да ўборкі азімага рапсу

Сельгаспрадпрыемствы Дубровенскага раёна актыўна рыхтуюцца ўключыцца ва ўборку яшчэ адной культуры — азімага рапсу. Паводле інфармацыі райсельгасхарча, па стане на раніцу 18 ліпеня, на рапсавыя палі тэхніку вывела СХФ ім.Ю. Смірнова.

— Усяго на Дубровеншчыне падлягае ўборцы 3706 га азімага рапсу. Увосень пасеялі эліту і суперэлиту і не пралічыліся. Добра зарэкамендавалі сябе гатункі "Онікс", "Залаты" і гібрыд "Канструктар", — распавёў галоўны спецыяліст упраўлення па сельскай гаспадарцы і харчаванні Аляксей Пучкоў.

Начальнік інспекцыі па насенняводстве, каранціне і за шчыце раслін Галіна Шляпiк адзначае, што на многіх палях раёна гэтая культура ўжо практычна гатовая да ўборкі.

— Напрыклад, у ААТ "Баброва-Агра" пасеяна 370 га азімага рапсу. Тут усё зрабілі своечасова: узаралі, унеслi ўгнаенні, на зіму — рэгулятары росту. Увесну правялі хімпраполку, апрацавалі фунгіцыдамі, а цяпер, за два тыдні да збору, — прыліпальнікам, каб скрыначкі з насеннем не рэпаліся, — звярнула ўвагу спецыяліст пры маніторынгу поля каля в. Савіна.

Ні для каго не сакрэт, што рапс — культура высокарэнтабельная. Гаспадарка пры яго рэалізацыі можа адчувальна зарабіць на свае патрэбы, а яшчэ гэта выдатны бялковы корм для буронак і папярэднік у полі для ўсіх збожжавых. Сёння асноўная задача аграрыяў —убраць ураджай да апошняга зярнятка.

dubrovno.by