02.05.2025

На Дубровеншчыне прыступілі да сяўбы яравога рапсу

За апошняе дзесяцігоддзе стаўленне да рапсу ў Беларусі змянілася.

Яго ацанілі і палюбілі, прызнаўшы карысную каштоўнасць вырабленых з яго прадуктаў. Кіраўнік дзяржавы арыентуе аграрыяў на тое, каб нарасціць аб'ёмы яго вытворчасці — культуры перспектыўнай і стратэгічнай з пазіцыі забеспячэння нацыянальнай харчовай бяспекі — удвая. Беларусь ужо ўваходзіць у топ-20 сусветных вытворцаў рапсу і ў топ-10 экспарцёраў рапсавага алею. Пры гэтым патэнцыял для далейшага развіцця галіны з улікам сучасных тэхналогій вырошчвання і глыбокай перапрацоўкі сыравіны значны. Высокія ўраджаі атрымліваюць не толькі за кошт пашырэння пасеваў, але і дзякуючы павышэнню ўраджайнасці культуры.

Вялікае значэнне гэтай культуры для сельскай гаспадаркі разумеюць і аграрыі Дубровеншчыны. На гэтым тыдні сельгаспрадпрыемствы прыступілі да сяўбы яравога рапсу, пад які ў раёне адведзена 1500 гектараў.

На адным з палёў ААТ "Праўда-З" мы ўбачылі, як завяршаецца сяўба гэтай культуры. Сельгаспрадпрыемства адвяло пад яго 100 га. У зямлю легла элітнае насенне гатунку "Віхор", якое было набыта ў Віцебскім занальным інстытуце сельскай гаспадаркі НАН Беларусі. Варта адзначыць, што гатунак аграрыямі апрабаваны і паказаў сябе з добрага боку.

Але, ураджай залежыць не толькі ад гатунку, але і ад таго, якія папярэднікі апрацоўваліся на полі, наколькі правільна выканана апрацоўка глебы, колькі і якіх угнаенняў было ўнесена.

Апрацоўваюць яравы рапс у асноўным пасля збожжавых культур, у ААТ "Праўда-з" яго папярэднікамі былі азімая пшаніца і шматгадовыя травы. Пры правільным севазвароце, сам рапс узбагачае глебу вялікай колькасцю арганічных рэшткаў, павялічваючы ўраджайнасць наступных збожжавых культур на 15-35%.

Пад пільнай увагай агранамічнай службы сельгаспрадпрыемства - своечасовае і якаснае ўнясенне ўгнаенняў пад сяўбу. Тут ведаюць, што ў рапса вялікая патрэба ў азоце, бо наяўнасць гэтага элемента ў дастатковай колькасці важна на працягу ўсёй вегетацыі, ён забяспечвае прырост масы, утварэнне большай колькасці струкоў і насення на адзінку плошчы. Унясенне дастатковай колькасці фосфару паляпшае ўтварэнне каранёў і насення, павышае ўстойлівасць да палягання і паскарае паспяванне. Калій важны для ўтварэння кветак і струкоў, а таксама падтрымання воднага балансу. У цэлым па раёне ў гэтыя дні да сяўбы яравога рапсу прыступілі СХФ ім. Ю.Смірнова і КУСГП ім. Чарняхоўскага.

Паводле аператыўнай інфармацыі ўпраўлення па сельскай гаспадарцы і харчаванні Дубровенскага райвыканкама, пасяўная ў раёне перасягнула экватар. Па стане на раніцу 26 красавіка раннімі яравымі збожжавымі і зернебабовымі засеяна 7640 га, што складае 87,8% ад плана. Завяршылі сяўбу аграрыі КУСГП ім. Чарняхоўскага, ААТ "Праўда-3", "Усход-Чырына", "Герой", "Баброва-Агра", ААТ "Якубава-Агра". Да сяўбы кукурузы прыступілі ў СХФ ім. Ю. Смірнова.

Працягваецца ўзворванне глебы. З 5342 га запланаваных, узарана 3313 га, што складае 68% ад плана.

dubrovno.by