15.05.2025

Міжраённы мехатрад працуе ў сельгаспрадпрыемствах Дубровенскага раёна

Палепшыць тэхнічнае абсталяванне сельгасвытворчасці краіны - на гэта арыентуе кіраўнік дзяржавы. Менавіта з гэтай мэтай у трох абласцях рэспублікі ў канцы мінулага года сфарміравалі міжраённыя механізаваныя атрады. Іх дапамога прыйшлася дарэчы аграрыям у пару веснавых палявых работ.

Аснашчэнне кожнага мехатрада вялікае: па пяць энерганасычаных трактароў МТЗ-3522, сем МТЗ-1221, пяць кормаўборачных і два збожжаўборачных камбайна, 17 аўтамабіляў МАЗ, а таксама шлейф прычапной тэхнікі.

Заводы-вытворцы да 1 красавіка паставілі нашаму прадпрыемству 49 адзінак трактароў, машын, навяснога абсталявання, — паведаміў дырэктар ААТ "Дубровенскі райаграсэрвіс" Дзмітрый Цімошчанка. - Тэхніку, якая паступіла прама з канвеераў, якая знаходзіцца на гарантыйным абслугоўванні, давяраем людзям з надзейнай рэпутацыяй і вопытам работы. Мы стварылі дадатковыя працоўныя месцы для вадзіцеляў, трактарыстаў, спецыялістаў інжынернатэхнічнай службы. Міжраённы атрад Дубровенскага райаграсэрвісу замацаваны за гаспадаркамі Дубровенскага, Лёзненскага і часткова Сенненскага раёнаў. На дадзены момант брыгады працуюць у ААТ "Рубежніца", СУП "Даўжа-Агра", ААТ "Студзёнка" і ў шэрагу сельгаспрадпрыемстваў Дубровенскага раёна. У ліку выконваемых работ - вывазка і ўнясенне арганічных і мінеральных угнаенняў, вапнаванне кіслых глеб, іх культывацыя і ўзворванне. Дзесьці працуе новая тэхніка, дзесьці ўжо былая ва ўжыванні. Старой яе не назавеш. Выглядае не горш за тую, што нядаўна з завода. Да таго ж праверана часам і мясцовымі спецыялістамі. У красавіку работнікамі мехатрада ў замацаваных гаспадарках было вывезена і ўнесена звыш 11 тысяч тон арганікі, унесена мінеральных угнаенняў на плошчы звыш 3000 гектараў, правапнавана 800 гектараў, ўзарана 200 гектараў, пракультывавана 400 гектараў.

Дзмітрый Цімашэнка падкрэсліў, што атрад будзе задзейнічаны цэлы год. Яму пад сілу выконваць поўны цыкл сельгасработ. - Аператыўнае выкананне патрэбных аперацый у лепшыя агратэхнічныя тэрміны дасць магчымасць павысіць якасць работы і дамагчыся яго большай прадукцыйнасці, — сказаў дырэктар ААТ "Дубровенскі райаграсэрвіс".

dubrovno.by