19.06.2026

Дубровенскія школьнікі актыўна працуюць летам

Крысціна Гуркіна скончыла 8-ы клас. Летам яна вырашыла не толькі адпачыць ад вучобы, але і папрацаваць.

На кірмашы вакансій, арганізаваным упраўленнем па працы, сацыяльнай абароне і занятасці насельніцтва, яшчэ вясной навучэнка сярэдняй школы №1 г. Дуброўна ім.А. Нікандравай пазнаёмілася з прапановамі ад розных прадпрыемстваў і арганізацый раёна. Магчымасць працаваць ва УП ЖКГ "Дуброўна Камунальнік" дзяўчыну зацікавіла, бо яна любіць даглядаць кветкі. У маі Крысціна прайшла медкамісію, і з 1 чэрвеня ўжо прыступіла да пасады працоўнага зялёнага будаўніцтва. Мы сустрэлі яе на вуліцы Камсамольская за праполкай кветнікаў з петуніямі.

- Гэта мой першы вопыт працы, стараюся выконваць свае абавязкі добра і адказна. Думаю, гэта выдатны старт для першага працоўнага вопыту: задачы нескладаныя, праца на свежым паветры і дастатковая аплата працы. Мне выдалі спецвопратку, пальчаткі, інвентар. За месяц абяцалі каля 800 рублёў, - распавядае Крысціна.

Дзяўчына падышла не толькі да працы, але і размеркавання першага заробку з усёй адказнасцю. Яна падзялілася, што ўсе грошы падзеліць на тры часткі: адну адразу аддасць бацькам, другую выдаткуе на ўласныя патрэбы: вопратку, забавы, прысмакі, а трэцюю абавязкова адкладзе, каб мець фінансавую падушку бяспекі.

Спецыялісты ўпраўлення па працы растлумачылі, што выплата заработнай платы будзе ажыццяўляцца са сродкаў бюджэту і дадалі, што з 10 чэрвеня ва УП ЖКГ працаўладкавана яшчэ трое школьнікаў. З кожным заключаны афіцыйны дагавор, а гэта значыць, што для дзяцей пачынаецца адлік іх працоўнага стажу. Прыемна, што дубровенскія падлеткі з першых летніх дзён выкарыстоўваюць магчымасць унесці свой уклад у важную справу па навядзенні чысціні і парадку ў родным горадзе. Гэта робіць летнюю занятасць не проста працай, а каштоўным жыццёвым вопытам для моладзі.

Алена Зайцава

dubrovno.by