02.05.2025

Дзень прызыўніка прайшоў у Дуброўне

У жыцці кожнага юнака надыходзіць момант, калі Айчына заклікае яго на вайсковую службу.

Быць на варце Радзімы — не толькі гонар, але і велізарная адказнасць. Урачыстае мерапрыемства, прысвечанае Дню прызыўніка, прайшло 18 красавіка ў раённым Цэнтры дзяцей і моладзі, дзе дубровенскія хлопцы атрымалі позвы аб прызыве ў розныя роды войскаў Узброеных Сіл Рэспублікі Беларусь.

Звяртаючыся з прывітальным словам да прызыўнікоў, пракурор Дубровенскага раёна Аляксандр Філёненка адзначыў: "Гонар, абавязак і служба радзіме — самыя галоўныя складнікі, пра якія вы павінны заўсёды памятаць. Перыяд службы ў шэрагах Узброеных Сіл Рэспублікі Беларусь — гэта дастойная старонка ў біяграфіі кожнага мужчыны. Перакананы, што гэты выдатны этап вы пройдзеце з гонарам, адужэеце фізічна і маральна.

Ваенная служба — гэта і школа фарміравання лепшых чалавечых якасцяў, такіх як патрыятызм, дысцыплінаванасць, уменне знаходзіць правільны выхад у складаных сітуацыях. Гэтыя якасці павінны стаць апорай у вашым жыцці".

Ва ўрачыстай абстаноўцы начальнік адасобленай групы (Дубровенскага раёна) ваеннага камісарыята Аршанскага і Дубровенскага раёнаў Яўген Шаргаеў уручыў некалькім дзясяткам навабранцаў позвы: "Сёння, у значны дзень, вы прымаеце позвы, каб папоўніць шэрагі Узброеных Сіл нашай краіны. Годна быць абаронцам Беларусі, сям'і, родных і блізкіх. Служба ў войску нялёгкая, але яна вам дазволіць стаць мужчынамі, грамадзянамі і патрыётамі сваёй краіны".

Да сказаных на дарогу слоў далучыліся яркія выступленні артыстаў раённага Дома культуры, чые музычныя нумары нікога не пакінулі абыякавымі і сталі прыемным падарункам для прызыўнікоў.

Дык з якім настроем маладыя людзі ідуць на службу ў войска? Прызыўнік Сяргей Дранькоў распавёў, што скончыў сёлета АДМЭК, і бацькі станоўча паставіліся да яго рашэння аддаць доўг Радзіме. "Што такое войска, ведаюць бацька і брат Антон, які адслужыў два гады таму і прыйшоў сёння падтрымаць мяне. Дзякуючы яму іду ў войска з упэўненасцю. Бо я ведаю, што па заканчэнні службы стану мацней і больш вопытны ў многіх аспектах, і таго ж жадаю астатнім хлопцам. Армія —выдатны спосаб даказаць, хто ты ёсць на самай справе", — упэўнены Сяргей Дранькоў.

dubrovno.by