05.03.2025

4 сакавіка прафесійнае свята адзначаюць супрацоўнікі органаў унутраных спраў

Штогод 4 сакавіка сваё прафесійнае свята адзначаюць супрацоўнікі органаў унутраных спраў, людзі, якія ахоўваюць грамадзян ад злачынных замахаў, сочаць за сітуацыяй на дарогах, забяспечваюць грамадскую бяспеку, выконваюць іншыя задачы па падтрыманні парадку і спакою ў краіне.

Служба ў міліцыі лічыцца адной з самых адказных, небяспечных і напружаных, але ў той жа час і ганаровых - прадстаўнікі гэтай прафесіі беззапаветна і аддана служаць свайму народу і Айчыне, застаюцца верныя свайму абавязку і прызванню. Напярэдадні Дня міліцыі мы сустрэліся з начальнікам раённага аддзела ўнутраных спраў падпалкоўнікам міліцыі Сяргеем Кляцом і пацікавіліся, якія прыярытэтныя напрамкі дзейнасці міліцыі ў Дубровенскім раёне, як вядзецца работа з рознымі катэгорыямі грамадзян і на што трэба звяртаць увагу пры выкарыстанні сучасных дасягненняў навукова-тэхнічнага прагрэсу.

Служачы закону, служым людзям

— Сяргей Мікалаевіч, з якімі вынікамі супрацоўнікі Дубровенскага РАУС прыйшлі да свайго прафесійнага свята?

- Не буду стамляць чытачоў лічбамі, скажу толькі, што па выніках 2024 года ў параўнанні з 2023 годам колькасць злачынстваў значна знізілася.

- Якія найбольш вострыя праблемы турбуюць райаддзел сёння?

- Па-ранейшаму асноўным відам злачынстваў, якія ўчыняюцца на тэрыторыі раёна, застаюцца крадзяжы. Пры дынаміцы зніжэння колькасці крадзяжоў, што захоўвалася на працягу 2024 года, — з 30 у 2023 годзе да 16 у 2024 (-46,7%) — гэты від злачынстваў па-ранейшаму аказвае асноўны негатыўны ўплыў на аператыўную абстаноўку ў раёне.

— У апошнія гады ўсё часцей даводзіцца чуць пра злачынствы ў сферы інфармацыйных тэхналогій…

— Не абыйшла гэтая праблема і наш раён. Колькасць зарэгістраваных кіберзлачынстваў у 2024 годзе крыху павялічылася. Урон ад гэтага віду злачынстваў склаў 16 296 беларускіх рублёў. З мэтай змяншэння колькасці патэнцыйных злачынстваў у адносінах да ўладальнікаў банкаўскіх рахункаў, папулярызацыі элементарных правілаў выкарыстання (захавання) персанальных даных уладальнікаў супрацоўнікамі РАУС на пастаяннай аснове праводзіцца прафілактычная работа па павышэнні лічбавай пісьменнасці насельніцтва ва ўзаемадзеянні з суб'ектамі прафілактыкі раёна.

— Як вядома, асноўнымі ўмовамі ўчынення супрацьпраўных дзеянняў з'яўляюцца п'янства, незанятасць працай або вучобай, негатыўны ўплыў асоб, якія маюць судзімасць, а таксама звязаныя з такім жыццём і паводзінамі іх сацыяльна-эканамічнае становiшча. Значыць, змагацца з гэтымі антыграмадскімі з'явамі трэба пачынаць у першую чаргу…

- Хачу адзначыць у гэтым плане значную работу, выконваемую аддзелам аховы правапарадку і прафілактыкі ў цесным кантакце з іншымі падраздзяленнямі і службамі раённага аддзела ўнутраных спраў, а таксама з насельніцтвам. У выніку сістэмнай работы ў 2024 годзе менш стала злачынстваў, на момант учынення якіх вінаватыя асобы знаходзіліся ў стане алкагольнага ап'янення.

За 2024 год па матэрыялах РАУС у лячэбна-працоўныя прафілакторыі ізалявана 16 чалавек, гэта на тры больш, чым у 2023 годзе. Да адміністрацыйнай адказнасці за незаконную дзейнасць, звязаную з нелегальным абаротам алкагольнай прадукцыі, прыцягнута 11 чалавек.

У цэлым, прымаемыя ў паўсядзённай дзейнасці меры ў пэўнай ступені садзейнічаюць стабілізацыі крымінагеннай сітуацыі, звязанай і з учыненнем злачынстваў у сферы хатняга гвалту.

У справаздачным перыядзе зарэгістраваны тры злачынствы катэгорыі "гвалт у сям'і" (2023 г. — 15). Пры гэтым не дапушчана ўчынення цяжкіх і асабліва цяжкіх злачынстваў названай катэгорыі (2023 г. - 7).

— Што можаце сказаць аб кадравым патэнцыяле РАУС?

- Калектыў працаздольны, згуртаваны. Супрацоўнікі накіраваны на эфектыўнасць работы па папярэджанні злачыннасці, імкнуцца задзейнічаць усе магчымасці і заўсёды гатовы да павышэння прафесійнага ўзроўню.

У нас сфарміравана моцнае ядро ​​прафесіяналаў, кожны супрацоўнік - на сваім месцы.

Аднак хацелася б назваць лепшых з лепшых: з крымінальнай міліцыі - Антона Новікава, з грамадскай бяспекі - участковага інспектара міліцыі аддзела аховы правапарадку і прафілактыкі Канстанціна Базанава, памочніка дзяжурнага аператыўна-дзяжурнай службы Юрыя Ракава.

Самы вопытны - старшы оперупаўнаважаны АУР Андрэй Аўсянкін, а інспектар ДПС Мікіта Лабкоўскі - самы малады і перспектыўны.

Каля 20 гадоў служыць у міліцыі Уладзімір Машукоў, у сферу яго абслугоўвання ўваходзіць работа з непаўналетнімі і іх сем'ямі. Ён ніколі не лічыцца з асабістым часам, днём і ноччу пры любым надвор'і выконвае ўскладзеныя на яго функцыі па ахове грамадскага парадку, заўсёды з разуменнем ставіцца да грамадзян, разбіраецца ва ўсіх праблемах, і людзі яму адказваюць даверам. Пры такой загружанасці ў яго, таты чацвярых дзяцей, атрымліваецца знайсці час і для сям'і.

— Якія якасці, на ваш погляд, павінен мець супрацоўнік міліцыі?

- Гэтыя якасці не памяняліся з часоў стварэння праваахоўнай сістэмы, застаюцца і будуць непарушнымі: добрапрыстойнасць, кампетэнтнасць, сумленнасць, прынцыповасць, сіла волі, мужнасць. Акрамя таго, асновай характару павінна стаць самавалоданне ў любой, нават самай складанай сітуацыі.

Напружаная служба супрацоўнікаў праваахоўных органаў падтрымліваецца дзяржавай на належным узроўні. З кожным годам паляпшаецца іх сацыяльная абароненасць: павышаецца заработная плата, ёсць магчымасць будаўніцтва жылля з выкарыстаннем ільготнага крэдытавання, вучоба курсантаў падтрымліваецца поўным дзяржзабеспячэннем і гэтак далей.

Супрацоўнікі праваахоўных органаў маюць права выхаду на пенсію ў 48 гадоў, пенсійнае забеспячэнне ў іх вышэйшае, чым у грамадзянскіх асоб, ёсць і перспектыва кар'ернага росту, прычым не толькі ў Дубровенскім раёне, але і на тэрыторыі рэспублікі.

Запрашаю ахвотных паступіць на службу ў органы ўнутраных спраў, тым больш, што ўжо хутка пачнецца ўступная кампанія, звяртацца ў наш аддзел кадраў, дзе ўсе запыты будуць разгледжаны. Калі ж у грамадзян узнікаюць праблемныя моманты ў жыцці, то яны могуць звяртацца ў міліцыю ў любы час сутак. Я таксама гатовы выслухаць кожнага наведвальніка і дапамагчы ў межах дзейнiчаючага заканадаўства.

— Што пажадаеце калегам напярэдадні свята?

- Перш за ўсё, віншую ўвесь склад раённага аддзела, нашых калег з Дэпартамента аховы, а таксама іх родных і блізкіх з прафесійным святам - Днём міліцыі. Жадаю ўсім моцнага здароўя, міру, дабра і дабрабыту ў сем'ях, поспехаў ва ўсім. Сіла нашай краіны ў адзінстве ў забеспячэнні грамадскай бяспекі.

Алена КОРСАКАВА

dubrovno.by