20.06.2023

Лукашэнка накіраваў спачуванне Прэзідэнту Уганды ў сувязі з атакай на школу на захадзе краіны

 

Прэзідэнт Беларусі Аляксандр Лукашэнка накіраваў спачуванне Прэзідэнту Уганды Ёверы Мусевені ў сувязі з тэрарыстычнай атакай на школу на захадзе краіны. Пра гэта паведамілі ў прэс-службе беларускага лідара.

Кіраўнік дзяржавы падкрэсліў, што ў Беларусі з вялікім смуткам і болем даведаліся пра тэрарыстычную атаку на агульнаадукацыйную школу ва Угандзе 17 чэрвеня 2023 года.

«Бязлітаснае забойства нявінных дзяцей — злачынства, якому ніколі не будзе ніякага прабачэння. Упэўнены, што арганізатары жудаснага ўчынку не пазбягуць заслужанага пакарання, — падкрэсліў Аляксандр Лукашэнка. — У гэтую цяжкую і сумную гадзіну я пасылаю словы падтрымкі вам і ўсім грамадзянам вашай краіны, глыбокія спачуванні родным і блізкім загінулых, пажаданні хутчэйшага выздараўлення параненым».